सिरानी

जती आफ्नो ठानेर
छातीमा टासेपनि
आखीरमा
टाउको टेकेरै छाड्छ सिरानी ।

धारा

कहाँ-कहाँ
टाढा-टाढाबाट बग्दै
आइदिन्छ पानी धारामा
मानौ आमाले पठाकि हुन्
एक बोरा कोशेली ।

मोबाइल

सधै
कि दिमागको सुन्नु
कि दिलको
दिमाग र दिल नहुनेले
मोबाइलको सुन्नु ।

छाता

झरीमा ओढेपछि
भिझेको छाता
लैजान्न मान्छे कोठाभित्र
ढोकाबाहिरै पर्खाउछ ।

जसरी
भगवान पर्खाइ रहेछ
मन्दिर बाहिरै मूर्तीकारलाइ ।

जुत्ता

हरेक पाइलामा 
साथ दिदा पनि
हरेक मोडमा
सँगै हिड्दा पनि
थोरै मात्र च्यातिदा आज
जुत्ताजस्तै बदल्यो मान्छेले
आफ्नो हमसफर ।

डायरी

सबैको
सबै-सबैको
व्यक्तिगत डायरी
लिक हुन पाए इन्टरनेटमा
थाहा हुने थियो-
इतिहासभन्दा पनि खुनी भविष्य ।

सिलिङ

नियममै सधै बाँधिने भए
ग्राभिटिको नियम 
मान्नु पर्थ्यो यो सिलिङले
र खस्नु पर्थ्यो 
मेरो आङमाथी ।

धेरैथोक जोगाउन
केहि नियम 
भत्काउनै पर्ने रै'छ ।

पञ्जा

हातका रेखाले
यदि भाग्य लेखिन्थे भने
म तिम्रो पञ्जा चोरेर
लैजान्थे आफूसँग
र ती रेखाका डामहरू
सारिदिन्थे
मेरा हत्केलाभरी ।

ट्वाइलेट पेपर

यो ट्वाइलेटमा नभएको भए
सायद डाइनिङ टेबलमा हुन्थ्यो
या पूजाघरमा ।

कागजका पनि 
कति जातहरू हुने
मान्छेमा झै ।

चुल्हो

दाउरा जलाउदै गर्दा
तिम्रो सम्झना पनि जलाउछु
म सधै जलिबस्छु
म सधै आगो खेलाउछु
मलाइ चुल्हो भन्ठान्छन्
र रोटी सेकाएर जान्छन् मान्छे ।